1 millón de tapóns para salvar a Lola

http://www.quepasanacosta.com/

1 millón por dicir unha cifra. Fagan as súas contas, máis de 150 bolsas de 1 metro de diámetro cheas ata rebentar de tapóns de plástico, recollidas no Colexio Eugenio López para unha causa solidaria.

Xa realizaran esta actividade a través dun centro da Coruña, pero este ano, dende a ANPA Uxío decidiron facer esta colleita na casa. De contado, a sociedade ceense tomou o relevo da campaña: alumnos, pais, comercios, negocios de hostelería e ata os sanitarios do hospital fixérona propia. Durante os últimos meses estiveron recolectando cada tapón de plástico que pasaba polas súas mans para destinalos a unha boa causa.

Falamos de costear os tratamentos médicos de Lola, unha pequena coruñesa nada o 2 de decembro do 2008, que sofre unha grave enfermidade cerebral. Parte dos coidados que necesita para paliar as consecuencias da súa dolencia e minimizar o atraso psicomotor que sofre, non lles cobre a Seguridade Social, polo que a súa nai, Paula Faro, o resto da familia e un grupo cada vez máis numeroso de colaboradores están pelexando para conseguir o diñeiro necesario.

A este gran movemento solidario, que recolle as roscas de plástico para que unha empresa de reciclaxe llos pague á familia da pequena, sumáronse enseguida centenares de persoas en todo Cee, que desde que empezou a campaña ata onte cando trasladaron un furgón cheo de tapóns a unha parcela do polígono de Cambre, non pararon de colaborar.
Desde unha imprenta de Corcubion que fixo os carteis gratis ata unha mueblería de Cee que cedeu a súa camioneta de xeito totalmente desinteresada, foron ducias os establecementos e as persoas implicadas, entre eles moitos bares, comercios locais, os placeiros do mercado municipal e os traballadores do Virxe da Xunqueira.

Nestas fotos vemos por exemplo aos pequenos do Eugenio xunto cos avós de Lola, cargando os tapóns para levalos a reciclar. Os propios avós trouxeron mostra de en que se estaban convertindo esas inútiles roscas gracias á súa reutilización.

Ademais, aproveitando a viaxe ata A Coruña, os representantes do ANPA fixéronse cunhas caixas de cartón específicas para o reciclado de móbiles, que distribuirán próximamente.

Con estas iniciativas, separadamente de colaborar en causas altruístas que serven para axudar a familias no momento que máis o necesitan, os escolares, os seus pais e quen lles apoian logran evitar que se centenares de quilos de materiais reutilizables acaben no cubo do lixo.